ਚੰਡੀਗੜ੍ਹ, 13 ਨਵੰਬਰ (ਪੰਜਾਬ ਲੋਕ ਸਮਾਚਾਰ ਬਿਊਰੋ):
ਪੰਜਾਬ ਸਰਕਾਰ ਨੇ ਹੋਟਲਾਂ, ਰਿਜ਼ੋਰਟਾਂ ਅਤੇ ਮੈਰਿਜ ਪੈਲੇਸਾਂ ਵਿੱਚ ਵਿਆਹ ਸਮਾਰੋਹਾਂ ਲਈ ਸ਼ਰਾਬ ਦੀਆਂ ਕੀਮਤਾਂ ਘਟਾ ਕੇ ਖਪਤਕਾਰਾਂ ਨੂੰ ਵੱਡੀ ਰਾਹਤ ਦਿੱਤੀ ਹੈ। ਪਰ ਵਿਸ਼ੇਸ਼ਗਿਆਨਾਂ ਦਾ ਮੰਨਣਾ ਹੈ ਕਿ ਇਸ ਨਾਲ ਪ੍ਰੋਗਰਾਮਾਂ ਦੌਰਾਨ ਸ਼ਰਾਬ ਦੀ ਖਪਤ ਵਿਚ ਵਾਧਾ ਹੋ ਸਕਦਾ ਹੈ, ਜਿਸ ਕਾਰਨ ਇਨ੍ਹਾਂ ਸਥਾਨਾਂ ਦੇ ਮਾਲਕਾਂ ਨੂੰ ਹੋਰ ਜ਼ਿਆਦਾ ਸਾਵਧਾਨ ਰਹਿਣ ਦੀ ਲੋੜ ਹੋਵੇਗੀ।
ਸਰਕਾਰ ਤੇ ਠੇਕੇਦਾਰ ਦੋਵੇਂ ਹੋਣਗੇ ਲਾਭਵਾਨ
ਸ਼ਰਾਬ ਉਦਯੋਗ ਨਾਲ ਜੁੜੇ ਕਾਰੋਬਾਰੀਆਂ ਅਨੁਸਾਰ, ਦਰਾਂ ਵਿੱਚ ਕਟੌਤੀ ਨਾਲ ਵਿਕਰੀ ਵਿੱਚ ਵਾਧਾ ਹੋਵੇਗਾ, ਜਿਸ ਨਾਲ ਨਾ ਸਿਰਫ਼ ਸ਼ਰਾਬ ਠੇਕੇਦਾਰਾਂ ਦੀ ਕਮਾਈ ਵਧੇਗੀ, ਸਗੋਂ ਸਰਕਾਰ ਨੂੰ ਵੀ ਆਬਕਾਰੀ ਮਾਲੀਆ ਦੇ ਰੂਪ ਵਿੱਚ ਵਧੇਰੇ ਆਮਦਨ ਹੋਵੇਗੀ। ਕਾਰੋਬਾਰੀ ਨਿਯਮਾਂ ਮੁਤਾਬਕ, ਵਿਕਰੀ ਜਿੰਨੀ ਵੱਧ, ਲਾਭ ਓਨਾ ਹੀ ਜ਼ਿਆਦਾ।
ਕੈਟਰਿੰਗ ਤੇ ਜੀ.ਐੱਸ.ਟੀ. ’ਤੇ ਹੋ ਸਕਦੀ ਨਿਗਰਾਨੀ
ਦਰਾਂ ਵਿੱਚ ਕਮੀ ਕਾਰਨ ਹੁਣ ਵਿਆਹ ਸਮਾਰੋਹ ਨਾ ਸਿਰਫ਼ ਵੱਡੇ ਹੋਟਲਾਂ ਜਾਂ ਰਿਜ਼ੋਰਟਾਂ ਵਿੱਚ, ਸਗੋਂ ਛੋਟੇ ਬੈਂਕੁਇਟ ਹਾਲਾਂ, ਕਲੱਬਾਂ ਅਤੇ ਵੱਡੇ ਰੈਸਟੋਰੈਂਟਾਂ ਵਿੱਚ ਵੀ ਹੋ ਸਕਦੇ ਹਨ। ਇਸ ਨਾਲ ਸਰਕਾਰ ਨੂੰ ਕੈਟਰਿੰਗ ਸੇਵਾਵਾਂ ’ਤੇ 18 ਪ੍ਰਤੀਸ਼ਤ ਜੀ.ਐੱਸ.ਟੀ. ਦੀ ਆਮਦਨ ਮਿਲੇਗੀ।
ਪਰ ਜੇਕਰ ਕਿਸੇ ਸਮਾਰੋਹ ਵਿੱਚ ਸ਼ਰਾਬ ਦੀ ਖਪਤ ਵਧੇਰੇ ਤੇ ਕੈਟਰਿੰਗ ਦਾ ਬਿੱਲ ਘੱਟ ਹੋਵੇ, ਤਾਂ ਉਹ ਮੈਰਿਜ ਪੈਲੇਸ ਜਾਂ ਰਿਜ਼ੋਰਟ ਜੀ.ਐੱਸ.ਟੀ. ਵਿਭਾਗ ਦੀ ਜਾਂਚ ਹੇਠ ਆ ਸਕਦੇ ਹਨ। ਇਸ ਲਈ ਪ੍ਰਬੰਧਕਾਂ ਨੂੰ ਨਿਯਮਾਂ ਦੀ ਪਾਲਣਾ ਕਰਦੇ ਹੋਏ ਹਰ ਲੈਣ-ਦੇਣ ਨੂੰ ਪਾਰਦਰਸ਼ੀ ਰੱਖਣ ਦੀ ਲੋੜ ਹੋਵੇਗੀ।
PUNJAB LOK SMAACHAAR
PUNJAB LOK SAMACHAR


0 Comments