ਗਣੇਸ਼ ਮੂਰਤੀ ਵਿਸਰਜਨ ਦੌਰਾਨ ਦੋ ਭਰਾਵਾਂ ਦੀ ਡੁੱਬਣ ਨਾਲ ਮੌਤ, ਤਿੰਨ ਨੌਜਵਾਨ ਬਚਾਏ

ਖੰਡਵਾ (ਮੱਧ ਪ੍ਰਦੇਸ਼), 26 ਸਤੰਬਰ — ਮੱਧ ਪ੍ਰਦੇਸ਼ ਦੇ ਖੰਡਵਾ ਜ਼ਿਲ੍ਹੇ ਵਿੱਚ ਗਣੇਸ਼ ਮੂਰਤੀ ਵਿਸਰਜਨ ਦੌਰਾਨ ਵਾਪਰੇ ਦਰਦਨਾਕ ਹਾਦਸੇ ਵਿੱਚ ਦੋ ਨੌਜਵਾਨਾਂ ਦੀ ਡੁੱਬਣ ਕਾਰਨ ਮੌਤ ਹੋ ਗਈ, ਜਦਕਿ ਤਿੰਨ ਹੋਰ ਨੌਜਵਾਨਾਂ ਨੂੰ ਸਥਾਨਕ ਲੋਕਾਂ ਨੇ ਸੁਰੱਖਿਅਤ ਬਚਾ ਲਿਆ। ਇਹ ਹਾਦਸਾ ਨਹਲਦਾ ਪਿੰਡ ਨੇੜੇ ਬੀਤੀ ਰਾਤ ਵਾਪਰਿਆ। ਮ੍ਰਿਤਕਾਂ ਦੀ ਪਛਾਣ ਵਿਸ਼ਵਾਸ ਪਟੇਲ (17) ਅਤੇ ਲਕਸ਼ਯ ਪਟੇਲ (16) ਵਜੋਂ ਹੋਈ ਹੈ। ਦੋਵੇਂ ਸਕੇ ਭਰਾ ਸਨ ਅਤੇ ਸਥਾਨਕ ਭਾਜਪਾ ਮੰਡਲ ਉਪ-ਪ੍ਰਧਾਨ ਦੇ ਪੁੱਤਰ ਦੱਸੇ ਜਾ ਰਹੇ ਹਨ। ਜਾਣਕਾਰੀ ਅਨੁਸਾਰ ਗਣੇਸ਼ ਮੂਰਤੀ ਵਿਸਰਜਨ ਲਈ ਪੰਜ ਨੌਜਵਾਨ ਨਹਲਦਾ ਪਿੰਡ ਨੇੜੇ ਸਥਿਤ ਕਰੀਬ 40 ਫੁੱਟ ਡੂੰਘੀ ਬੱਜਰੀ ਦੀ ਖਾਨ ਵਿੱਚ ਬਣੇ ਪਾਣੀ ਵਿੱਚ ਉਤਰ ਗਏ। ਇਸ ਦੌਰਾਨ ਉਹ ਅਚਾਨਕ ਡੁੱਬਣ ਲੱਗੇ। ਨੌਜਵਾਨਾਂ ਨੂੰ ਡੁੱਬਦਾ ਦੇਖ ਕੇ ਸਥਾਨਕ ਪਿੰਡ ਵਾਸੀਆਂ ਨੇ ਤੁਰੰਤ ਮੌਕੇ ’ਤੇ ਪਹੁੰਚ ਕੇ ਤਿੰਨ ਨੌਜਵਾਨਾਂ ਨੂੰ ਬਚਾ ਲਿਆ। ਹਾਦਸੇ ਦੀ ਸੂਚਨਾ ਮਿਲਣ ਤੋਂ ਬਾਅਦ ਐਸ.ਡੀ.ਆਰ.ਐੱਫ., ਹੋਮ ਗਾਰਡ ਅਤੇ ਓਂਕਾਰੇਸ਼ਵਰ ਤੋਂ ਸਿਖਲਾਈ ਪ੍ਰਾਪਤ ਗੋਤਾਖੋਰਾਂ ਦੀ ਟੀਮ ਮੌਕੇ ’ਤੇ ਪਹੁੰਚੀ। ਬਚਾਅ ਕਾਰਜ ਕਰੀਬ ਪੰਜ ਘੰਟਿਆਂ ਤੱਕ ਜਾਰੀ ਰਿਹਾ। ਦੇਰ ਰਾਤ ਗੋਤਾਖੋਰਾਂ ਨੇ ਦੋਵਾਂ ਭਰਾਵਾਂ ਦੀਆਂ ਲਾਸ਼ਾਂ ਪਾਣੀ ਵਿੱਚੋਂ ਬਾਹਰ ਕੱਢ ਲਈਆਂ। ਹਾਦਸੇ ਤੋਂ ਬਾਅਦ ਪਿੰਡ ਵਿੱਚ ਸੋਗ ਦੀ ਲਹਿਰ ਦੌੜ ਗਈ। ਪੁਲਿਸ ਵੱਲੋਂ ਮਾਮਲੇ ਸਬੰਧੀ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ।