ਗੁਲਮਰਗ — ਗੁਲਮਰਗ ਵਿੱਚ ਰੋਪਵੇਅ ਸੇਵਾ ਦੌਰਾਨ ਆਈ ਤਕਨੀਕੀ ਖਰਾਬੀ ਕਾਰਨ ਕੇਬਲ ਕਾਰਾਂ ਵਿੱਚ ਫਸੇ ਸੈਂਕੜੇ ਸੈਲਾਨੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢਣ ਲਈ ਭਾਰਤੀ ਫੌਜ, ਐਸ.ਡੀ.ਆਰ.ਐਫ, ਐਨ.ਡੀ.ਆਰ.ਐਫ, ਜੰਮੂ-ਕਸ਼ਮੀਰ ਪੁਲਿਸ ਅਤੇ ਸਥਾਨਕ ਟੀਮਾਂ ਵੱਲੋਂ ਸਾਂਝਾ ਬਚਾਅ ਅਭਿਆਨ ਚਲਾਇਆ ਗਿਆ। ਜੀਓਸੀ 19 ਡਿਵੀਜ਼ਨ ਦੇ ਮੇਜਰ ਜਨਰਲ Manoj Joshi ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਬਚਾਅ ਕਾਰਵਾਈ ਦੁਪਹਿਰ ਕਰੀਬ 2 ਵਜੇ ਸ਼ੁਰੂ ਹੋਈ ਅਤੇ ਲਗਾਤਾਰ ਸਾਢੇ ਛੇ ਘੰਟੇ ਤੱਕ ਜਾਰੀ ਰਹੀ। ਉਨ੍ਹਾਂ ਕਿਹਾ ਕਿ ਪੂਰੇ ਬੇਸ ਤੋਂ ਸਟੇਜ-1 ਤੱਕ ਲਗਭਗ 65 ਕੇਬਲ ਕਾਰਾਂ ਫਸੀਆਂ ਹੋਈਆਂ ਸਨ, ਜਿਨ੍ਹਾਂ ਵਿੱਚ ਕਰੀਬ 200 ਤੋਂ 325 ਸੈਲਾਨੀ ਮੌਜੂਦ ਸਨ।ਉਨ੍ਹਾਂ ਦੱਸਿਆ ਕਿ ਇਸ ਮੁਹਿੰਮ ਵਿੱਚ ਐਸ.ਡੀ.ਆਰ.ਐਫ, ਐਨ.ਡੀ.ਆਰ.ਐਫ, ਜੰਮੂ-ਕਸ਼ਮੀਰ ਪੁਲਿਸ, ਸਥਾਨਕ ਪੋਨੀ ਰਾਈਡਰਾਂ, ਏ.ਟੀ.ਵੀ ਟੀਮਾਂ, ਭਾਰਤੀ ਫੌਜ ਅਤੇ ਹਾਈ ਐਲਟੀਟਿਊਡ ਵਾਰਫੇਅਰ ਸਕੂਲ ਦੀਆਂ ਟੀਮਾਂ ਨੇ ਮਿਲਜੁਲ ਕੇ ਕੰਮ ਕੀਤਾ। ਟੀਮਾਂ ਵੱਲੋਂ ਇੱਕੋ ਸਮੇਂ 6 ਤੋਂ 7 ਕੇਬਲ ਕਾਰਾਂ ‘ਤੇ ਰਾਹਤ ਕਾਰਜ ਚਲਾਇਆ ਗਿਆ, ਜਿਸ ਕਾਰਨ ਹਨੇਰਾ ਹੋਣ ਤੋਂ ਪਹਿਲਾਂ ਜ਼ਿਆਦਾਤਰ ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ।
ਮੇਜਰ ਜਨਰਲ ਮਨੋਜ ਜੋਸ਼ੀ ਨੇ ਕਿਹਾ ਕਿ ਸੈਲਾਨੀਆਂ ਨੂੰ ਮੈਗਾਫੋਨ ਰਾਹੀਂ ਲਗਾਤਾਰ ਐਲਾਨ ਕਰਕੇ ਸ਼ਾਂਤ ਰਹਿਣ ਅਤੇ ਘਬਰਾਉਣ ਦੀ ਲੋੜ ਨਾ ਹੋਣ ਬਾਰੇ ਦੱਸਿਆ ਜਾਂਦਾ ਰਿਹਾ। ਉਨ੍ਹਾਂ ਕਿਹਾ ਕਿ ਸੈਲਾਨੀਆਂ ਨੇ ਵੀ ਪੂਰਾ ਧੀਰਜ ਦਿਖਾਇਆ ਅਤੇ ਸਹਿਯੋਗ ਕੀਤਾ।ਉਨ੍ਹਾਂ ਮੁਤਾਬਕ ਆਖਰੀ ਕੇਬਲ ਕਾਰ ਵਿੱਚ ਫਸੇ ਲੋਕਾਂ ਨੂੰ ਰਾਤ ਕਰੀਬ 8 ਵਜੇ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਮੁੱਖ ਤਕਨੀਕੀ ਖਰਾਬੀ ਦੁਪਹਿਰ 12 ਤੋਂ 1 ਵਜੇ ਦੇ ਵਿਚਕਾਰ ਆਈ ਸੀ, ਜਿਸ ਤੋਂ ਬਾਅਦ ਬਚਾਅ ਟੀਮਾਂ ਨੂੰ ਸੂਚਿਤ ਕੀਤਾ ਗਿਆ।
ਮੇਜਰ ਜਨਰਲ ਨੇ ਇਹ ਵੀ ਕਿਹਾ ਕਿ ਮੌਸਮ ਬਹੁਤ ਖਰਾਬ ਹੋਣ ਕਾਰਨ ਰਾਹਤ ਕਾਰਜ ਚੁਣੌਤੀਪੂਰਨ ਰਿਹਾ। ਕਈ ਵਾਰ ਭਾਰੀ ਮੀਂਹ ਅਤੇ ਗੜੇ ਪੈਣ ਦੇ ਬਾਵਜੂਦ ਸਾਰੀਆਂ ਏਜੰਸੀਆਂ ਨੇ ਹੌਸਲੇ ਅਤੇ ਸਮਰਪਣ ਨਾਲ ਕੰਮ ਕੀਤਾ ਅਤੇ ਸਫਲਤਾਪੂਰਵਕ ਰਾਹਤ ਮੁਹਿੰਮ ਪੂਰੀ ਕੀਤੀ।
0 Comments