ਵਾਸ਼ਿੰਗਟਨ, 22 ਸਤੰਬਰ (ਇੰਟਰਨੈਸ਼ਨਲ ਡੈਸਕ) - ਅਮਰੀਕੀ ਵ੍ਹਾਈਟ ਹਾਊਸ ਨੇ ਸੋਮਵਾਰ ਨੂੰ ‘ਟਰੰਪ ਟੀਵੀ’ ਸ਼ੁਰੂ ਕਰਨ ਦਾ ਐਲਾਨ ਕੀਤਾ। ਇਹ ਇੱਕ ਡਿਜੀਟਲ ਨੈੱਟਵਰਕ ਹੈ, ਜੋ ਟਰੰਪ ਪ੍ਰਸ਼ਾਸਨ ਨਾਲ ਸਬੰਧਤ ਸਮੱਗਰੀ 24 ਘੰਟੇ ਪ੍ਰਸਾਰਿਤ ਕਰੇਗਾ। ਇਸ ਦੀ ਸ਼ੁਰੂਆਤ ਅਜਿਹੇ ਸਮੇਂ ਹੋਈ ਹੈ, ਜਦੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਅਮਰੀਕੀ ਮੀਡੀਆ ਸੰਗਠਨਾਂ ਵਿਚਕਾਰ ਤਣਾਅ ਚੱਲ ਰਿਹਾ ਹੈ। 18 ਸਤੰਬਰ ਨੂੰ ਟਰੰਪ ਨੇ ਵ੍ਹਾਈਟ ਹਾਊਸ ਤੋਂ CNN, MS NOW ਅਤੇ Politico ਨੂੰ ਰੋਕਣ ਦਾ ਐਲਾਨ ਕੀਤਾ ਸੀ। ਉਨ੍ਹਾਂ ਨੇ ਇਨ੍ਹਾਂ ਮੀਡੀਆ ਸੰਗਠਨਾਂ 'ਤੇ ‘ਜਾਅਲੀ ਖ਼ਬਰਾਂ’ ਫੈਲਾਉਣ ਦੇ ਦੋਸ਼ ਲਗਾਏ ਅਤੇ ਹੋਰ ਮੀਡੀਆ ਸੰਸਥਾਵਾਂ ਵਿਰੁੱਧ ਵੀ ਕਾਰਵਾਈ ਦੀ ਚਿਤਾਵਨੀ ਦਿੱਤੀ। ਇਸ ਫੈਸਲੇ ਦੇ ਵਿਰੋਧ ਵਿੱਚ ਕੁਝ ਅਮਰੀਕੀ ਟੀਵੀ ਨੈੱਟਵਰਕਾਂ ਵੱਲੋਂ ਟਰੰਪ ਦੀ ਲਾਈਵ ਕਵਰੇਜ ਰੋਕਣ ਦੀ ਗੱਲ ਸਾਹਮਣੇ ਆਈ ਹੈ। ਵ੍ਹਾਈਟ ਹਾਊਸ ਹੈਲੀਪੈਡ ਤੋਂ ਉਨ੍ਹਾਂ ਦੀ ਆਮਦ ਦਾ ਸਿੱਧਾ ਪ੍ਰਸਾਰਣ ਵੀ ਨਹੀਂ ਕੀਤਾ ਗਿਆ। ਇਸ ਤੋਂ ਇਲਾਵਾ ਸੰਯੁਕਤ ਰਾਸ਼ਟਰ ਮਹਾਸਭਾ ਵਿੱਚ ਟਰੰਪ ਦੇ ਭਾਸ਼ਣ ਦਾ ਵੀ ਸਿੱਧਾ ਪ੍ਰਸਾਰਣ ਨਾ ਕੀਤੇ ਜਾਣ ਦੀ ਗੱਲ ਕਹੀ ਗਈ ਹੈ। ‘ਟਰੰਪ ਟੀਵੀ’ ਦੀ ਸ਼ੁਰੂਆਤ ਨੂੰ ਵ੍ਹਾਈਟ ਹਾਊਸ ਅਤੇ ਰਵਾਇਤੀ ਅਮਰੀਕੀ ਮੀਡੀਆ ਵਿਚਕਾਰ ਵਧ ਰਹੇ ਟਕਰਾਅ ਦੇ ਪਿਛੋਕੜ ਵਿੱਚ ਦੇਖਿਆ ਜਾ ਰਿਹਾ ਹੈ।
0 Comments